“Huiswerk” in die kleuterskool?

Eerstens is dit baie belangrik om die term “huiswerk” hier te verduidelik. ’n Kleuterskool kind behoort geen werkkaart tipe taak te kry vir huiswerk nie. Om verwarring te voorkom gaan ons eerder praat van tuisoefeninge. Dit is egter noodsaaklik. En dit dui daarop dat mamma tuis ook nuwe konsepte en vaardighede wat by die skool geleer word moet vaslê en inoefen om sodoende die kind te help om dit te bemeester. Tuisoefeninge is dus noodsaaklik vir voldoende stimulasie en vaslegging van nuwe konsepte. ’n Kind moet konsepte en vaardighede in verskillende omgewings en situasies kan uitvoer of weergee en daarom is dit noodsaaklik dat dit wat hulle by die skool leer deurgetrek word na die alledaagse lewe. Alledaagse lewe aktiwiteite en stimulasie is soveel ryker en meer effektief as gestruktureerde leer. 

Jou kind se juffrou is opgelei om te weet wat sy mylpale is en hoe dit verander soos hy ouer word, asook hoe die verwagting vermeerder. Jy as mamma moet ook jouself bekend maak met wat van hom verwag kan word. Wanneer juffrou sekere konsepte, waarmee jou kind dalk nog sukkel, onder jou aandag bring is dit belangrik om dit dus aan te spreek. Vra raad by jou kind se klasjuffrou of ander kundiges oor hoe jy hierdie konsepte ook tuis kan stimuleer. 

In die kind se tuiste is hy heel waarskynlik die mees ontspanne en sal hy meer ontvanklik wees om hierdie konsepte aan te leer op ’n speelse wyse. By die huis kan hy ook blootgestel word aan ’n groter verskeidenheid van metodes om die konsepte vas te lê sonder ekstra druk. 

Omdat hy die konsepte tuis konkreet kan oefen en toepas deur alledaagse aktiwiteite, maak dat die integrasie van die konsepte makliker sal plaasvind omdat die aktiwiteite relevant en betekenisvol is vir hom.